Gratun
« Ազգապատում, Հատոր Բ by Մաղաքիա Օրմանեան

Տ. Ղազար Ա. Ջահկեցի

2004. Անկիւրիոյ Դէպքերը

Անկիւրիոյ մէջ ալ նմանօրինակ ձեռնարկներ սկսած էին ուստի պէտք եղաւ այնտեղ ալ կարևոր հրամանները հասցնել, և զօրաւոր ու վստահելի առաջնորդ մըն ալ ղրկել. ուստի Նալեան պատրիարք Նիկոմիդայէ Անկիւրիա փոխադրեց Աթանաս Կոստանդնուպոլսեցի եպիսկոպոսը, որ իր աշակերտներէն էր։ Չամչեան, որ Անկիւրիոյ չորս եկեղեցիները նորէն գրաւուած կ՚ենթադրէ հռոմէականներէն, Աթանասի ձեռքով նորէն ետ առնուած կ՚ըսէ (ՉԱՄ. Գ. 826)։ Բայց ուրիշներ այդ պարագան կ՚անգիտանան (ԳԱԼ. 191), և միայն Պահատուրեանի և Տամատեանի ձեռօք եղած օրինազանց գործողութիւնները կը յիշեն։ Աթանաս տեսնելով որ զինք մտիկ չեն ըներ, պարտաւորուեցաւ խստութեան դիմել, և հրովարտակին զօրութեամբ Անկիւրիայէ հեռացնել և Սամսոն աքսորել տուաւ Ումուտեան Սիմոն եպիսկոպոսը, Պահատուրեան Պետրոս և Մէհտէրեան Գէորգ վարդապետները, և Մուրատ Մելքոնեան, խուպիար Մելքոնեան, Արթին Իփրիմեան, Սահակ Վարդերեսեան, Սահակ Թասվիրճեան, ու Հաճի Ֆէրաշաթ գլխաւորները (ԳԱԼ. 191)։ Ասոնք երեք ամիս Սամսոն մնալէ եհքը Կոմստանդնուպոլսոյ թիարանը փոխադրուեցան, և երեք ամիսէ ալ անկէ ազատեցան կաշառքով ու տուգանքով։ Սիմոն եպիսկոպոսը փութաց Հռոմ ապաւինիլ, Պահատուրեան և Մէհտէրեան վարդապետներ քիչ ետքը Կ. Պոլսոյ մէջ մեռան, իսկ աշխարհականներ իրենց քաղաքը դարձան (ՉԱՄ. Գ. 326)։ Չատըրճեան Կարապետ վարդապետն ալ, թէպէտ ձերբակալուեցաւ, բայց խոյս տալով Վենետիկ ապաւինեցաւ (ԳԱԼ. 192)։ Ինչպէս ամէն շարժումէ ետքը, այս անգամ ալ միջոց մը խեղդուեցան կաթոլիկական վէճերը, մինչև անոնց արծարծուիլը։

« 2003. Կաթոլիկ Ծէսեր   |   2005. Երուսաղէմի Գործեր »
© Gratun.org