Gratun
Search  show page numbers   Sign in
« Ժամագիրք

Հրաժարումն

Զղջումն - Մեղայ ամենասուրբ Երրորդութեանն

Մեղա՜յ ամենասուրբ Երրորդութեանն` Հօր եւ Որդւոյ եւ Հոգւոյն Սրբոյ: Մեղուցեա՜լ եմ Աստուծոյ: Խոստովանիմ առաջի Աստուծոյ եւ սրբուհւոյ Աստուածածնին եւ առաջի քո, հա'յր սուրբ, զամենայն մեղս, զոր գործեալ եմ: Քանզի մեղայ խորհրդով, բանիւ եւ գործով, կամայ եւ ակամայ, գիտութեամբ եւ անգիտութեամբ, մեղա՜յ Աստուծոյ:

Մեղա՜յ հոգւովս եւ զօրութեամբ սորա, մտօքս եւ շարժմամբ սորա, մարմնովս եւ զգայութեամբ սորա: Մեղայ զօրութեամբ հոգւոյս` խորամանկութեամբ, անզգամութեամբ, յանդգնութեամբ եւ երկչոտութեամբ, շռայլութեամբ եւ ժլատութեամբ, զեղխութեամբ եւ անիրաւութեամբ, չարահաւանութեամբ, յուսահատութեամբ եւ թերամտութեամբ. մեղա՜յ Աստուծոյ:

Մեղա՜յ չար խորհրդով մտացս` նենգութեամբ, ատելութեամբ, խեթիւ, մախանօք, յաչաղանօք, թուլութեամբ, պոռնկական խորհրդով, արուական, իգական, անասնական, գրաստական, գազանական, ի գիշերի եւ ի տուընջեան. երազական գիջութեամբ եւ անրջական գարշ աղտեղութեամբ. մեղա՜յ Աստուծոյ:

Մեղա՜յ ցանկութեամբ մարմնոյս` հեշտութեամբ, պղերգութեամբ, յօրանջմամբ քնոյ, շարժութեամբ մարմնոյս եւ զազրագործութեամբ ի պէս-պէս ախտս. հեշտալրութեամբ լսելեացս, արատութեամբ աչացս, ցանկութեամբ սրտիս, իգութեամբ ռնգացս, պագշոտութեամբ բերանոյս, անժուժկալութեամբ, շուայտութեամբ եւ արբեցութեամբ. մեղա՜յ Աստուծոյ:

Մեղա՜յ չարաբանութեամբ լեզուիս` ստախօսութեամբ, սուտ երդմամբ, երդմնազանցութեամբ, հակառակութեամբ, վիճաբանութեամբ, բանսարկութեամբ, շոգմոգութեամբ, քսու, դատարկաբանութեամբ եւ ծաղու, զրախօսութեամբ, հերձախօսութեամբ եւ անիծաբանութեամբ, տրտնջելով, դժգոհելով, բամբասելով եւ հայհոյելով. մեղա՜յ Աստուծոյ:

Մեղա՜յ գողութեամբ ձեռացս` ագահելով, զրկելով, հարկանելով, սպանանելով եւ ընդ քարշս ածելով, մեղա՜յ Աստուծոյ:

Մեղա՜յ ամենայն յօդուածովք շինուածոյս եւ ամենայն անդամօք մարմնոյս. հնգեակ զգայարանօքս եւ վեցեկի շարժմամբս. վերամբարձ ոտնահարութեամբ եւ վայրաքարշ մեղկութեամբ, յաջ եւ յահեակ խոտորելով, զառաջնոցն մեղանչելով եւ վերջնոցն չար նշաւակ գոլով, մեղայ Աստուծոյ:

Այլ եւ մեղա՜յ եօթնիցս յանցանօք մահացու մեղօք` հպարտութեամբ եւ մասամբք նորին, նախանձու եւ մասամբք նորին, բարկութեամբ եւ մասամբք նորին, ծուլութեամբ եւ մասամբք նորին, ագահութեամբ եւ մասամբք նորին, որկրամոլութեամբ եւ մասամբք նորին, բղջախոհութեամբ եւ մասամբք նորին. մեղա՜յ Աստուծոյ:

Այլ եւ մեղա՜յ ամենայն պատուիրանացն Աստուծոյ` յանձնառելեացն եւ հրաժարելեացն. զի ոչ զյանձնառականսն կատարեցի եւ ոչ ի հրաժարելեացն հեռացայ, զօրէնս առի եւ յօրինացն հեղգացայ, ի կարգս քրիստոնէութեան հրաւիրեցայ եւ գործովս անարժան գտայ, գիտելով զչարն` կամաւ կորացայ եւ ի բարեաց գործոց ես ինձէն հեռացայ. վա'յ ինձ, վա'յ ինձ, վա'յ ինձ: Զո՞րն ասեմ, կամ զո՞րն խոստովանիմ, զի անթիւ են յանցանք իմ, անասելի են անօրէնութիւնք իմ, աններելի են ցաւք իմ, եւ անբժշկելի են վէրք իմ. մեղա՜յ Աստուծոյ:

Հա'յր սուրբ, զքեզ ունիմ միջնորդ հաշտութեան եւ բարեխօս առ Միածին Որդին Աստուծոյ, զի իշխանութեամբդ, որ տուեալ է քեզ, արձակեսցես զիս ի կապից մեղաց իմոց, աղաչե՜մ զքեզ:

« Խոստովանիմք եւ հաւատամք   |   Արձակումն - Ողորմեսցի քեզ մարդասէրն »
© Gratun.org