Gratun
Search  show page numbers   Sign in
« Ժամագիրք

Խրատք ժամատեղեաց

Խրատք ժամատեղեաց ըստ արեւելեան սահմանացն սկսուածոց եւ ասութեանց աղօթից, զոր խնդրեաց սուրբ վարդապետն Յակոբ Ղրիմեցի ի մեծ րաբունւոյն Գրիգորէ Խլաթեցւոյն: Եւ կատարեաց այսպէս:

Որ դասի, որ աւուր ձայնն լինի, այս է`

Տէ'ր, եթէ զշրթունսն: Զքէն գոհանամքն: Օրհնեալ Տէր մեր Յիսուս Քրիտսոսն: Կանոնագլուխն: Կանոնի աղօթքն: Զկնի ալէլուիայից եւ թագաւորացն` Սաղմոսիւք եւ օրհնութեամբն եւ այլն, որ լինի: Մեծացուսցէի աղօթքն, այլ եւ Ողորմի փառքն: Սուրբ Աստուածի աղօթքն: Արձակման աղօթքն, թէ' պահոց եւ թէ' ուտեաց: Արեւագալի Սուրբ ես Տէրն եւ արձակմանն: Ճաշու Առաջնորդեայն: Հայր գթութեանցն: Անկեալն: Ճաշու սկսուածքն: Լուր ձայնիցն: Համբարձին: Յոյս կենացն: Խաղաղականին` Շնորահատու բարեացն:

Իսկ կողման դասուն այս է` սկսուածք օրհնութեան եւ հարցին եւ իւր աղօթիցն: Տէր յերկնիցն եւ իւր փառացն: Սուրբ ես, Տէրն, զկնի մանկանցն: Արեւագալի աղօթքն: Զառաւօտու զաղօթս: Ճաշու խաղաղութեամբ: Փարատեա: Քրիստոս Որդի Աստուծոյն: Իսկ ժամամուտ եւ շարական` ձայնին է:

Կիւրակէից ճաշու` Եսային եւ աւետարանն` ձայնին է: Առաքեալն` կողմանն է: Իսկ լուր աւուր գիրք` կողմանն է: Աւետարանն ձայնին է:

Երեկոյի Խոնարհեցոն` ձայնին է: Ապրեցոն, Հայր գթածն, Տէր բարերարն, Քրիստոս Որդին` կողմանն է: Հայր մերն` ձայնին է:

Հաւատով խոստովանիմ աղօթքն ԻԴ տուն է` ըստ ԻԴ ժամուցն: Իսկ Տէր մեր եւ Փրկիչ, Տէր Աստուած մերն` ի կարգէ դուրս է, ժամարարին է եւ հարկեւոր հիւրին: Այս է արեւելեան տան սահմանն ժամակարգութեան ի փառս Աստուծոյ: Յորժամ թուականն հայոց կոճատ լինի, բուն ձայնքն` աձ. բձ. գձ. դձ, յաջակողման դասուն լինին, ուր սուրբ Աւազանն է, եւ յորժամ դար լինի, ձախոյն լինին:

« Արձակումն - Ողորմեսցի քեզ մարդասէրն   |   Տէր եթէ զշրթունս իմ բանաս »
© Gratun.org