Gratun
« Ազգապատում, Հատոր Բ by Մաղաքիա Օրմանեան

Տ. Գրիգոր Ժ. Ջալալբէգեանց

1499. Ուրիշ Վկաներ

Առանց մանրամասնութիւնները գիտնալու քանի մը ուրիշ նահատակներու ալ կը հանդիպինք, որոնց անունները կուզենք յիշել անմոռաց չթողլու համար։ Այսպէս է նախ, տէր Աստուածատուր Վանեցի, որ նահատակեցաւ 1448-ին գրուած յիշատակարանի մը համեմատ (ՓԻՐ. 158), թւականը անորոշ։ Նոյնպէս Սքանդար որ է Աղէքսանդր Ասլան-Մէլիքենց, որ 1465-ին վկայեալ է վասն Քրիստոսի աստուածութեան (ՓԻՐ. 220), տեղը անորոշ։ Նոյնպէս պարոն Լոյս, զոր նահատակեցին 1467-ին (ՍԱՄ. 175) եւ որուն տեղը Կաֆա ըսուած եւ ուրիշի կողմէ (ՓԻՐ. 227) թէպէտ դժուար է ընդունիլ, Կաֆա քաղաքին Լատիններու իշխանութեան ներքեւ գտնուելուն համար։ Նահատակին իշխանազուն մը ըլլալը կը քաղուի պատուանուէն եւ ուղիղ չերեւիր ուրիշներուն Պարոնլոյս յատուկ անուն մը կազմելը (ՓԻՐ. 227)։ Ասոնք են առայժմ մեր հանդիպած անունները։ Նահատակներէն դուրս սովոր ենք նշանաւոր անձերու եւ գրողներու յիշատակներն ալ քաղել, սակայն դժբախտաբար շատ աղքատ է այդ մասին մեր պատմութեան առարկայ եղող դարը։

« 1498. Յովհաննէս Տարօնեցի   |   1500. Յաջորդելն Ու Դիրքը »
© Gratun.org